එක් දුරකතන සමාගමක් ඕනෑම දුරකතන ජාලයක් වෙත මසක කාලයක් නොමිලේ දුරකතන ඇමතුම් ලබා ගැනීමට සහ සමාජ මාධ්‍ය වෙත නොමිලේ පිවිසීමට හැකි දිනකට ගිගාබයිට් එක බැගින් මසකට ගිගාබයිට් 30 ක ප්‍රමාණයක් ලබා දී තිබූ දුරකතන පැකේජවල මිල ඉහළ දමා ඇතැයි පාරිභෝගිකයන් මැසිවිලි නගන බවට පසුගිය දා බීබීසී සිංහල වෙබ් අඩවිය සඳහන් කොට තිබිණ.ඉන් පැවසුණු අන්දමට පාරිභෝගිකයකු එතෙක් රුපියල් 988 ක මුදලක් ගෙවා සක්‍රීය කරගත් පැකේජය 2024.10.05 වැනි දින සිට ලබාගත නොහැකි බව එම පාරිභෝගිකයාට සේවා සපයන දුරකතන සමාගම දන්වා තිබේ. ඒ වෙනුවට, 1,298 ක් වැය කර නව පැකේජය සක්‍රීය කර ගන්නා ලෙසට අදාළ සමාගම විසින් දැනුම් දී තිබූ අතර පසුව නව පැකේජයක් හඳුන්වා දෙමින් එම දුරකතන සමාගම දන්වා ඇත්තේ එම පැකේජය සඳහා අය කෙරෙන ගාස්තුව රුපියල් 1,989 ක් බවයි.මෙම නව පැකේජ ගාස්තු සම්බන්ධයෙන් බීබීසී සිංහල සේවය එක්තරා දුරකතන සමාගමකින් විමසූ අවස්ථාවේ ඔවුන් ප්‍රකාශ කර ඇත්තේ ගිගාබයිට් 30 පැකේජය ගිගාබයිට් 12 දක්වා අඩුකර ඇති බවකි.ඒ පිළිබඳව පසුගිය සැප්තැම්බර් මස 1 වැනිදා සිට නව සබඳතා ලබාගත් පාරිභෝගිකයන් ඒ සම්බන්ධයෙන් දැනුවත් කළ බව ද එම දුරකතන සමාගම ප්‍රකාශ කර ඇත.
වගකිය යුතු මාධ්‍යයක් ලෙස බීබීසී සිංහල සේවය මේ සම්බන්ධයෙන් තවත් සමාගමකින් විමසීමක් කළ විට එම සමාගම සඳහන් කර ඇත්තේ පැවති පැකේජවල මිල ගණන් නොවෙනස්ව පවතින බවයි. මෑතකදී දුරකතන ගාස්තුවල කිසිදු සංශෝධනයක් සිදුකර නොමැති බවත් රුපියල් 797 සහ 1,599 පැකේජ අලු‍තින් හඳුන්වා දුන් පැකේජ බවත් ඔවුන් පවසා තිබේ. ඒ අතර පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ පෙන්වා දී ඇත්තේ ද ඩේටා පැකේජ හරහා ඇතැම් දුරකතන සමාගම් පාරිභෝගිකයන්ගෙන් අනිසි ලෙස මුදල් අයකිරීම් සිදුවන බව ය.
එහෙත් වගකිය යුතු මාධ්‍යයක් ලෙස බීබීසී සිංහල සේවය මේ සම්බන්ධයෙන් තවත් සමාගමකින් විමසීමක් කළ විට එම සමාගම සඳහන් කර ඇත්තේ පැවති පැකේජවල මිල ගණන් නොවෙනස්ව පවතින බවයි. මෑතකදී දුරකතන ගාස්තුවල කිසිදු සංශෝධනයක් සිදුකර නොමැති බවත් රුපියල් 797 සහ 1,599 පැකේජ අලු‍තින් හඳුන්වා දුන් පැකේජ බවත් ඔවුන් පවසා තිබේ. ඒ අතර පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ පෙන්වා දී ඇත්තේ ද ඩේටා පැකේජ හරහා ඇතැම් දුරකතන සමාගම් පාරිභෝගිකයන්ගෙන් අනිසි ලෙස මුදල් අයකිරීම් සිදුවන බව ය.මෙය ඔහු ගේ අදහසකට වඩා වත්මන් සමාජයේ පවත්නා පොදු මතවාදයක් හුවා දක්වන්නකි.
නමුත් මේ සම්බන්ධයෙන් අදහස් පළ කරමින් ශ්‍රී ලංකා විදුලි සංදේශ නියාමන කොමිෂන් සභාවේ නියෝජ්‍ය අධ්‍යක්ෂ ඉන්ද්‍රජිත් හඳපාන්ගොඩ ප්‍රකාශ කර ඇත්තේ වෙනම කතාවකි.එනම් මේ වන විට ක්‍රියාත්මක වන පැකේජ ගාස්තු කිසිවක් සංශෝධනය කර නොමැති අතර දුරකතන සමාගම් අලු‍තින් අයක්‍රම සැලසුම් (Tariff plan) අනුමත කරගෙන ඇති බවයි. ඉන් පවතින අයක්‍රම සැලසුම්වල මිල වැඩි කිරීමක් හෝ පවතින ප්‍රති ලාභ අඩු කිරීමක් ඉන් සිදු නොවන බව ද ඔහු ප්‍රකාශ කර ඇත. දුරකතන සමාගමක් අය ක්‍රම සැලසුමක් ඉදිරිපත් කළ පසු එම පැකේජය භාවිත කරන පුද්ගලයකුට දුරකතන සමාගම අවම වශයෙන් වසරක කාලයක් සේවාව සැපයිය යුතු අතර වසරකට පසු සංශෝධනයකට යෑමට හැකි බවද ශ්‍රී ලංකා විදුලි සංදේශ නියාමන කොමිෂන් සභාවේ නියෝජ්‍ය අධ්‍යක්ෂ වරයා සඳහන් කර තිබේ.එමෙන්ම දුරකතන සමාගම්වල අවශ්‍යතාව පරිදි නව පැකේජ වෙළෙඳපොළට හඳුන්වා දීමට අනුමැතිය ඉල්ලා ශ්‍රී ලංකා විදුලි සංදේශ නියාමන කොමිෂන් සභාව වෙත ඉල්ලු‍ම් කරන බව ද ඔහු සඳහන් කර ඇත.ඒ හැරුණු කොට ජංගම දුරකතන සේවා සපයන සමාගම් සඳහා දුරකතන පැකේජවල මිල ගණන් ඉහළ දැමීමට කිසිම අවසරයක් ලබා දී නැතැයි ශ්‍රී ලංකා විදුලි සංදේශ නියාමන කොමිෂන් සභාව පවසයි.ඒ අතර නිසි අවසරයකින් තොරව දුරකතන සමාගම් පැකේජවල මිල ගණන් වැඩි කිරීමට කටයුතු කළහොත් කොමිෂන් සභාව දුරකතන සමාගම්වලට ලබා දී ඇති බලපත්‍ර අහෝසි කරන බවත්, එවැනි ආකාරයේ වැඩි කිරීමක් සිදුව ඇත්නම් ශ්‍රී ලංකා විදුලි සංදේශ පනත යටතේ පැවරී ඇති බලතල ප්‍රකාරව කටයුතු කරන බවත් ඉන්ද්‍රජිත් හඳපාන්ගොඩ දන්වා සිටියි. ඔහු පවසන අන්දමට තමා සක්‍රිය කර ඇති දුරකතන පැකේජයක මිල ගණන් ඉහළ ගොස් ඇත්නම් ඒ සම්බන්ධයෙන් තොරතුරු සාධක සහිතව කොමිෂන් සභාව වෙත ඉදිරිපත් කිරීමට පාරිභෝගිකයන්ට පුළුවන.එමෙන්ම සමාජ මාධ්‍ය ඇතුළු මාධ්‍යවල පළවන ඉහත සඳහන් දැන ගැනීමට ලැබීමත් සමඟ කොමිෂන් සභාව විසින් සියලු ජංගම දුරකතන සමාගම්වලින් විමසීමක් කළ බව ද ඒ අනුව සියලු ජංගම දුරකතන සමාගම් කිසිම මිල වැඩිකිරීමක් සිදු කර නැති බවට ලිඛිතව දැනුම් දී ඇතැයි ද ඔහු පවසයි. එබැවින් මෙවැනි අසත්‍ය ප්‍රචාරවලට මහජනතාව නොරැවටෙන ලෙස ඉල්ලා සිටින කොමිෂන් සභාව මෙවැනි අසත්‍ය ප්‍රචාර කරන මාධ්‍ය ආයතනවලට හා මාධ්‍යවේදීන්ට විරුද්ධව පවත්නා නීති අනුව කටයුතු කිරීමට කොමිෂන් සභාව මේ වනවිටත් පියවර ගනිමින් සිටින බවත් ඔහු වැඩි දුරටත් පවසා සිටියි.
අප සමාජයේ වැඩි දෙනෙක් මේ වන විට තම අත්‍යාවශ්‍ය වියදම් අතරට දුරකතන ගාස්තු ද එක් කර ගෙන සිටිති. ඇතැම්හු තම කෑම බීම වෙනුවෙන් යොදවන මුදලින් කොටසක් ද දුරකතන ගාස්තු ලෙස වෙන් කරති.ඒ අනුව මෙය අතිශය සංවෙදී කාරණයකි.ඒ අනුව දුරකතන සමාගම් වල ඇතැයි කියන කලු කඩ ජාවාරම් සහ “කොලේ වසා ගැහීම්” ආදිය වශයෙන් දුරකතන පාරිභෝගිකයන් සමාජ ජාල ආදිය මඟින් ඉදිරිපත් කරන අවනඩු හුදෙක් මුසාවන් සේ සලකනු බැරි ය. එනිසා එවැන්නක් පිළිබඳව ඉවක් වැටුණු සැනින් එය ලුහුබැඳ ගොස් එහි ඇත්ත නැත්ත විමසා කටයුතු කිරීම ශ්‍රී ලංකා විදුලි සංදේශ නියාමන කොමිෂන් සභාවේ යුතුකම හා වගකීම බව අපි පෙන්වා දෙමු.
මීට දශක කිහිපයකට පෙර ජන ජීවිතයට එතරම් සම්බන්ධ නොවූ දුරකතනය අද වන විට සමාජයට නැතිවම බැරි මෙවලමක් වී තිබේ.මේ වන විට පවතින සමාජ යාන්ත්‍රණය අනුව එදිනෙදා “කුලී වැඩක් “කර ගන්නා තැනැත්තා ගේ සිට සමාජයේ සෑම ජන කොටසක ගේම ප්‍රධාන සන්නිවේදන මෙවලම දුරකතනය බව නිසැක ය.හුදෙක් තමන්ගේ හැඟීම් ආවේග අන්‍යයන් වෙත ප්‍රකාශ කිරීමේ සිට තම දිවි පැවැත්ම සඳහා අත්‍යාවශ්‍යම කරුණු සන්නිවේදනය කර ගැනීම තෙක් යොදා ගත හැකි වීම මත දුරකතනය වත්මන් සමාජයේ වැඩි කොටසකට නැතිවම බැරි මෙවලමක් වී තිබේ.ඒ අනුව අප සමාජයේ වැඩි දෙනෙක් මේ වන විට තම අත්‍යාවශ්‍ය වියදම් අතරට දුරකතන ගාස්තු ද එක් කර ගෙන සිටිති. ඇතැම්හු තම කෑම බීම වෙනුවෙන් යොදවන මුදලින් කොටසක් ද දුරකතන ගාස්තු ලෙස වෙන් කරති.ඒ අනුව මෙය අතිශය සංවෙදී කාරණයකි.ඒ අනුව දුරකතන සමාගම් වල ඇතැයි කියන කලු කඩ ජාවාරම් සහ “කොලේ වසා ගැහීම්” ආදිය වශයෙන් දුරකතන පාරිභෝගිකයන් සමාජ ජාල ආදිය මඟින් ඉදිරිපත් කරන අවනඩු හුදෙක් මුසාවන් සේ සලකනු බැරි ය. එනිසා එවැන්නක් පිළිබඳව ඉවක් වැටුණු සැනින් එය ලුහුබැඳ ගොස් එහි ඇත්ත නැත්ත විමසා කටයුතු කිරීම ශ්‍රී ලංකා විදුලි සංදේශ නියාමන කොමිෂන් සභාවේ යුතුකම හා වගකීම බව අපි පෙන්වා දෙමු.ඒ එය පුවත් අනාවරණය කරන මාධ්‍ය කරුවන් බියවැද්දීමට හා ලුහුබැඳීමට වඩා ජනතාවාදී පියවරක් වන බැවිනි.
රේණුකා දමයන්ති