මෙවර කන්නයේ වී මිලදී ගැනීම සඳහා රජය රුපියල් කෝටි හය සියයක මුදලක් වෙන්කර තිබූ අතර එම මුදලින් වී මෙට්‍රික් ටොන් පනස් පහක් මේ වන විට මිලදී ගෙන තිබෙන බවත්, එම වී තොගය සහල් බවට පත්කර ජනතාවට අලෙවි කරන බවත් වී අලෙවි මණ්ඩලයේ සභාපති මංජුල පින්නලන්ද මහතා සඳහන් කරයි.ඒ අනුව මෙවර කන්නයේ වී මිලදී ගැනීමෙන් පසු ඉතුරු වන මුදල් නැවත මහා භාණ්ඩාගාරයට යන බවත්, ඉදිරි කන්නයේදී එම මුදල් යොදාගෙන වී මිලදී ගැනීමට හැකියාවක් තිබෙන බව ද ඔහු පවසයි.වී අලෙවි මණ්ඩලය වී මිලදී ගැනීමේදී සියයට දාහතරේ වියළි තත්ත්වය සලකා බලන අතර පසුගිය කාලයේදී පැවැති වැසි සහිත කාලගුණය නිසා ගොවීන්ට මෙම ප්‍රමිති තත්ත්වයෙන් වී ලබා දීමට නොහැකි වූ බවද සඳහන් කළ මංජුල පින්නලන්ද මහතා ඉදිරියේදී තෙත වී ලබා ගෙන අදාළ වියළි තත්ත්වයට පත් කළ හැකි තාක්ෂණය වී අලෙවි මණ්ඩලයට ලබා ගැනීමට සැලසුම් කර තිබෙන බවද පවසයි.එමෙන්ම ඔහු පවසනුයේ පෞද්ගලික අංශයේ වෙළෙදුන් තෙත වී ලබා ගත් නිසා මෙවර කන්නයේදී ගොවීන්ට වී අලෙවි කර ගැනීමේදී කිසිදු ගැටලුවක් ඇති නොවූ බවකි. ඒ අතර පසුගිය කාලයේදී වී අලෙවි මණ්ඩලය සතු ගබඩා අබලන් තත්ත්වයට පත්ව තිබූ වී අලෙවි මණ්ඩලය සතු ගබඩා යථා තත්ත්වයට පත්කර ගැනීමට රජයට විශාල මුදලක් වැ‍ය වූ අතර ගොවීන් පවසනුයේ මෙවර ගොවීන් පෞද්ගලික අංශයට වී අලෙවි කිරීමට හේතුව ඔවුන් රජයේ සහතික මිල ඉක්මවා වී මිල දී ගැනීමට ඉදිරිපත් වීම බව ය.එමෙන්ම ඒ අනුව වත්මන් රජය මැතිවරණ ප්‍රචාරක කටයුතු වල දී ජනතාව හමුවේ පවසා තිබූ “සහල් මෝල් මාෆියාව “යන්න පවත්නා තත්වයන් යටතේ යාවත් කාලීන කිරීමට ද රජය අපොහොසත්ව තිබේ.