දරුවන්ගේ අසභ්‍ය ඡායාරූප සහ වීඩියෝ පට අන්තර්ජාලයට හෝ සමාජ මාධ්‍ය හරහා විසුරුවාහරින පුද්ගලයන් හඳුනාගත හැකි අන්තර්ජාතික දත්ත පද්ධතියක් සමඟ එකතුවීමට ශ්‍රී ලංකා පොලීසියට හැකිවූ බව නියෝජ්‍ය පොලිස්පතිනි රේණුකා ජයසුන්දර මහත්මිය පවසයි.
එම දත්ත පද්ධතිය හඳුන්වන්නේ ‘International Center for Missing & Exploited Children’ ලෙසයි.
මීට මාස 2 කට පමණ පෙර මෙම දත්ත පද්ධතිය හා එක්වීමට ශ්‍රී ලංකා පොලිසියට හැකි වූ බවත් ඒ හරහා අන්තර්ජාලය ඔස්සේ නිතර අසභ්‍ය වීඩියෝ නරඹන පුද්ගලයන් පිළිබඳව තොරතුරු ලබාගත හැකි බවත් නියෝජ්‍ය පොලිස්පතිනිය සඳහන් කරයි.
අන්තර්ජාල සේවා සපයන ආයතන මෙම අන්තර්ජාතික දත්ත පද්ධතිය හා සම්බන්ධ වී එම තොරතුරු හුවමාරු කරගන්නා අතර ඒ හරහා ඉතා පහසුවෙන් එවැනි පුද්ගලයන් හඳුනා ගැනීමට හැකියාව ඇති බවද ජයසුන්දර මහත්මිය පවසන ලදි.
2023 වසරේ අන්තර්ජාලය ඔස්සේ දරුවන් අපයෝජයට ලක්වන සිද්ධි 98,000ක් ලැබී ඇති බවත් 2022 වසරේ නව මාධ්‍ය ඔස්සේ දරුවන් 146,000 ක් අපයෝජනයට ලක්වී ඇති බවත් රේණුකා ජයසුන්දර මහත්මිය සඳහන් කරයි.