හීලෑ අලි ඇතුන් රැක බලා ගැනීම සඳහා ජාතික සත්වෝද්‍යාන දෙපාර්තමේන්තුව මගින් ඇත්ගොව්වන් පුහුණු කිරීමේ පාඨමාලාවක් ආරම්භ කිරීමට තීරණය කර ඇති බව එහි අධ්‍යක්ෂ ආචාර්ය තිලක් ප්‍රේමකාන්ත මහතා පවසයි.අධ්‍යක්ෂ වරයා පවසනුයේ ඒ සඳහා මේ දිනවල අයදුම්පත් කැඳවා ඇති බවකි..මුතු රාජා ඇතා යළි තායිලන්තයට රැගෙන යාමේ සිද්ධිය මූලික කර ගනිමින් මෙවැනි පාඨමාලාවක් ආරම්භ කිරීම පිළිබඳ තීරණයක් ගත් බව ද තිලක් ප්‍රේමකාන්ත මහතා පවසයි.මාස හයක පාඨමාලාවක් වශයෙන් ක්‍රියාත්මක කිරීමට අපේක්ෂිත මේ සඳහා වයස හෝ අධ්‍යාපන සුදුසුකම් සලකා නොබැලෙන බව ද අධ්‍යක්ෂ ජනරාල්වරයා අවධාරණය කරයි.මූලික වශයෙන් එම පාඨමාලාව සඳහා 25 දෙනෙකු පමණක් බඳවා ගැනීමට සැලසුම් කොට තිබුණ ද අයදුම්පත් ඊට වැඩි ගණනක් ලැබුණහොත් බඳවා ගන්නා ප්‍රමාණය ද ඉහළ දැමීම පියවර ගන්නා බව ද ඔහු පවසයි.මුල් මාස දෙක තුළ මාස දෙකේදී පින්නවල ජාතික සත්ත්වෝද්‍යානයේ පුහුණු මධ්‍යස්ථානයේ න්‍යායාත්මක පුහුණුවකුත්, ඉතිරි මාස හතරේදී පින්නවල අලි අනාථාගාරයේදීම ප්‍රායෝගික පුහුණුවකුත් ලබා දීමට නියමිතය.011 – 2712751, 011 – 2712752 හෝ 011 – 2712753 යන දුරකතන අංක වලට ඇමතීමෙන් මෙම පාඨමාලාව සම්බන්ධයෙන් වැඩිදුර තොරතුරු දැනගත හැක.