රෝගී තත්ත්වයක් නොවූවත් තරබාරුකම බරපතල රෝග ගණනාවකටම මං පාදන්නකි. නමුත් තරබාරුකම යනු අප සිතන ආකාරය වෙනස් කිරීමෙන් අත්මිදිය හැකි තත්ත්වයක් බව බොහෝ දෙනා දන්නේ නැත.
” කෑවත් නැතත් කොච්චර ආහාර පාලනය කළත් මං මහත් වෙන එක නතර කරන්න බෑ” යන්න තරබාරු අය නිතර පවසනු අසන්නට ලැබේ. එසේ සිතමින් තම සිත රවටා ගන්නා ඔවුන් තම ආහාර රටාවෙන් සහ ජීවන රටාවෙන් අත්මිදෙන්නට කිසිදු උත්සාහයක් දරන්නේ නැත. වැසි කාලයට ජලය පිරී විශාලව දිස්වන ගඟ යනු එම ගඟෙහි නියම ස්වභාවය නොවේ. එය ස්ථිරව පවතින්නක්ද නොවේ. වැසි නිමාවී නියං කාලයකදී එය සිහින් දිය පහරක් සේ වුවද දිස්වන්නට පුළුවන.
ඔබේ ශරීරයද එසේම ය. තරබාරු බව හෝ කෙසඟ බව සැමදා එකසේ පවතින්නේ නැත. වැසි ජලයෙන් පිරුණු ගඟ සේ ශරීරය ද විශාලත්වයෙන් අඩුවක් නැතිව එකසේ දිගටම පවතින්නේ නම් එයට හේතුව ශරීරයට ඔබ ලබා දෙන ආහාරවල වෙනසක් නොවී, ජීවන රටාවේ වෙනසක් නොවී, එකම සංස්කෘතියකට කොටුවී ජීවත් වීම ය.
වෙනස් කරගන්නට නොහැකි යැයි සිතන අපගේ ශරීරයට වෙනස් වන්නට හැකියාව ඇත. අප කළ යුතු වන්නේ අපේ ශරීරයට වෙනස් වන්නට අවකාශ ලබාදීම ය. අපේක්ෂා නොකරන මොහොතක බිමටම වුවද කඩා වැටෙන්නට හැකියාව ඇති මේ ශරීරය වෙනස් කරගන්නේ කෙසේදැයි අපි දැන් සොයා බලමු.
බැලූ බැල්මටම බර වැඩියැයි සිතෙන අපගේ ඒ වැඩි බර කිලෝ ග්‍රෑම් 10ක් හෝ 15 ක් පමණ විය හැකිය. මොහොතකට සිතා බලන්න, කිලෝ ග්‍රෑම් 5ක් බර හාල් මල්ලක් ඔබට කොයිතරම් වෙලාවක් එක දිගට පහසුවෙන් ඔසවාගෙන සිටීමට පුළුවන්ද? එලෙසින් සිරුර තරබාරු අය කිලෝ ග්‍රෑම් 10 ක, 15 ක අනවශ්‍ය බරක් තම සිරුරේ එල්ලාගෙන සිටින්නේ කොතරම් අපහසුතාවයකින්ද ? උසට සරිලන බරට අමතරව තිබෙන වැඩි බර යනු තෙල් බරයි. මෙම තෙල් බර අපට කිසිසේත්ම යහපතක් නම් සලසන්නේ නැත.
ආහාර පාලනය කරන්නට පටන් ගත් පසු ඉතා කෙටි කාලයකින් සිරුරේ බර අඩුවීම බොහෝ දෙනා බලාපොරොත්තු වෙති. නමුත් අපේ ශරීරය මේ තරමටම හැදී වැඩෙන්නට කොතරම් කාලයක් ගතවුණේදැයි මොහොතක් සිතා බලන්න. එලෙසින්ම තරබාරු සිරුරක් සිතන තරම් ඉක්මනින් බර අඩු කර ගැනීමේ හැකියාව නැත. ඔබගේ උසට සරිලන බරට සාපේක්ෂව BMI අගය ගණනය කිරීමෙන් ඔබේ බර කොතරම් වැඩි දැයි ඕනෑම වෛද්‍යවරයෙකුගෙන් ඔබට දැන ගැනීමට පුළුවන.
බැලූ බැල්මටම බර වැඩියැයි සිතෙන අපගේ ඒ වැඩි බර කිලෝ ග්‍රෑම් 10ක් හෝ 15 ක් පමණ විය හැකිය. මොහොතකට සිතා බලන්න, කිලෝ ග්‍රෑම් 5ක් බර හාල් මල්ලක් ඔබට කොයිතරම් වෙලාවක් එක දිගට පහසුවෙන් ඔසවාගෙන සිටීමට පුළුවන්ද? එලෙසින් සිරුර තරබාරු අය කිලෝ ග්‍රෑම් 10 ක, 15 ක අනවශ්‍ය බරක් තම සිරුරේ එල්ලාගෙන සිටින්නේ කොතරම් අපහසුතාවයකින්ද ? උසට සරිලන බරට අමතරව තිබෙන වැඩි බර යනු තෙල් බරයි. මෙම තෙල් බර අපට කිසිසේත්ම යහපතක් නම් සලසන්නේ නැත.
පාසල් යන අවධියේ සෙමින් ගමනක් නැතිව දුව පැන වැඩ කළ අප තරබාරු බවත් සමඟ වාඩිවූ තැනින් නැගිටින්නටවත් සිතක් නොදෙන තත්ත්වයකට පත් වන්නේ සිතා ගන්න බැරි ආකාරයට ය. එලෙස තරබාරු බවත් සමග ජීවත්වන විට දණහිස් වේදනාව, අධි රුධිර පීඩනය, දියවැඩියාව, හෘදයාබාධ ආදිය පුල පුලා බලා සිටින්නේ ඊට අවස්ථාවක් ලැබෙන තුරු ය.
එසේ නම් දැන් ඔබ විසින්ම වැඩි කරගත් සිරුරේ බර නැවත උසට සරිලන බරකට රැගෙන ඒම හැකි ඉක්මනින් ආරම්භ කළ යුතු බව ඔබට වැටහෙනු ඇත. ඒ සඳහා පළමුව ආහාර පාලනයත්, දෙවනුව ව්‍යායාමත්, තෙවනුව මාස කීපයක් එක දිගටම ඒ පිළිබඳව විමසිල්ලෙන් පසුවීමත් අවශ්‍ය වේ.
ආහාර පාලනය ලෙස බොහෝ දෙනා සිතා සිටින්නේ ආහාර අඩුවෙන් ගැනීම ය. නමුත් ආහාර පාලනය යනු එය නොව නුසුදුසු ආහාර වලින් වැළකී සිටීමය. කල් ඉකුත්වන දින ගනිමින්, රස සුවඳ පාට පිරිසිදු බව බලමින් නොයෙක් ආහාරපාන අප ගන්නේ ඒවායේ යහමින් නැති විටමින් වර්ග අපේ ශරීරයට යහපතක් කරාවි යැයි සිතා ගෙන ය. නමුත් සිදුවූ යහපත කුමක්ද ?
ඔබ ආහාර ගන්නේ ඇයි? මුලින්ම ඒ ගැටලුවට ඔබට දෙන්නට ඇති පිළිතුර කුමක්දැයි සිතා බලන්න.
කුසගින්න හැරුණු විට තවත් බොහෝ හේතු ඔබ ඊට පිළිතුරු ලෙස දක්වනු ඇත.
රස නිසා, සුවඳ නිසා, පැහැය ලස්සන නිසා, අනෙක් අය බෙදන නිසා, ඉවත දැමීම අපරාධයක් නිසා, අනෙක් අයගේ හිත රිදෙන නිසා මේ ආදී විවිධ හේතු ආහාර ගැනීම සඳහා ඔබට බලපෑම් කරනු ඇත. නමුත් සැබෑවටම අප ආහාර ගත යුත්තේ කුසගින්න නිවාගැනීමට අවශ්‍ය නිසා පමණි. සෑම දිනකම සෑම කුසගින්නක්ම අපට දැනෙන්නේ එකම ආකාරයකට වුවද, ඒ කුසගින්න නිවා ගන්නට අප ගත් ආහාර එකකට එකක් වෙනස් ඒවා නොවේද? මුලින්ම අප ආහාර ගැනීම ආරම්භ කරන්නේ කුසගින්න නිවා ගැනීමට ය. නමුත් අප ආහාර ගෙන නිම කරන්නේ කුසගින්න නිමා වූ පසුවත් තව තවත් ආහාර ගෙන ඉන් එහාට තවත් කන්නට නොහැකි තැනට පැමිණි පසුව ය. ඒ ආකාරයට කොපමණ ආහාර ගත්තත් ශරීරයට අදාළ නැති පෝෂණ කොටස් භාරගන්නට ශරීරය සූදානම් නැත.
විවාහයෙන් පසු දරුවන් ලබන මව්වරුන් දරුවන්ට යැයි කියා පෝෂණ ගුණයෙන් අනූන ආහාර නිතර පිළියෙළ කරද්දී දරුවන් නොකා ඉතිරි කරන ආහාරවලට කරන්නේ කුමක්ද? “අහක දාන එක අපරාදෙනේ” යැයි කියමින් එම ආහාරයෙන් තම කුස පුරවා ගැනීම ය. ශ්‍රී ලාංකික මව්වරුන්ගේ බර කිලෝ ගණනින් වේගයෙන් ඉහළ යාමට මෙයද හේතුවක් වෙයි. මෙය බටහිර රටවලට සාපේක්ෂව හාත්පසින්ම වෙනස් තත්ත්වයකි. විවාහ වී දරුවන් ලැබූ පසු මවුවරුන් තරබාරු වීම සාමාන්‍ය දෙයක් ලෙස සිතන්නට අපේ සමාජය පුරුදු වී හිඳී. නමුත් එය එසේ විය යුතු නැත.
ශරීරයට අවශ්‍ය පෝෂණ කොටස් මොනවාද?
ශරීරය ඉල්ලා සිටින්නේ කෙඳි සහිත ආහාර විශාල ප්‍රමාණයකි. ඒ පිටි ආහාර හා ප්‍රෝටීන කුඩා ප්‍රමාණයක්, සුළු තෙල් ප්‍රමාණයක් සහ එළවළු පලතුරු ආදියෙන් ලැබෙන අවශ්‍ය විටමින් ප්‍රමාණයයි.
නමුත් අප බොහෝ විට කරන්නේ මුලින්ම පිඟාන බත්වලින් පුරවා ගැනීම ය. එළවළු පලතුරු ආදිය අප ගන්නේ ඉතා සුළු ප්‍රමාණයකි. අපේ ඒ ආහාර රටාවත් සමඟ සිරුර තරබාරු වන විටම ව්‍යායාම ක්‍රම ක්‍රමයෙන් නතර වන්නේ අපටම නොදැනුවත්ව ය. එහි අවසාන ප්‍රතිඵලය තමන්ටවත් තමන්ව පාලනය කරගත නොහැකි අධික තරබාරු බවට පත්වීමයි.
විවාහයෙන් පසු දරුවන් ලබන මව්වරුන් දරුවන්ට යැයි කියා පෝෂණ ගුණයෙන් අනූන ආහාර නිතර පිළියෙළ කරද්දී දරුවන් නොකා ඉතිරි කරන ආහාරවලට කරන්නේ කුමක්ද? “අහක දාන එක අපරාදෙනේ” යැයි කියමින් එම ආහාරයෙන් තම කුස පුරවා ගැනීම ය. ශ්‍රී ලාංකික මව්වරුන්ගේ බර කිලෝ ගණනින් වේගයෙන් ඉහළ යාමට මෙයද හේතුවක් වෙයි. මෙය බටහිර රටවලට සාපේක්ෂව හාත්පසින්ම වෙනස් තත්ත්වයකි. විවාහ වී දරුවන් ලැබූ පසු මවුවරුන් තරබාරු වීම සාමාන්‍ය දෙයක් ලෙස සිතන්නට අපේ සමාජය පුරුදු වී හිඳී. නමුත් එය එසේ විය යුතු නැත.
සියල්ල වෙනස් කරන්නට නම් මුලින්ම කළ යුත්තේ ආහාර රටාව වෙනස් කිරීමයි. එහිදී පැණි රස සහ තෙල් සහිත ආහාරවලින් හැකිතාක් ඈත් විය යුතුය. ආහාර පාලනයට නම් මාසයක් පමණවත් බොහෝ පුරුදු ඔබ අලුතින්ම පුහුණු වීම අවශ්‍ය ය. ආහාර පාලනයේදී පැණි රස සහ තෙල් සහිත ආහාර ආගන්තුක සත්කාරයක් සඳහාවත් නිවසට රැගෙන ඒමෙන් ඔබට වැළකී සිටින්නට සිදුවනු ඇත.
යම් කෙනෙකු ආහාරවලින් සතුටක් ලබන්නට උත්සාහ දරන්නේ සිතට සතුට දැනෙන වෙනත් මාර්ග නැති විට ය. එනිසා නිවෙස තුළ සතුට සාමය රඳවා ගන්නට පවුලේ අනෙකුත් සාමාජිකයින් ද සමඟ වෙනත් ක්‍රම අත්හදා බලන්න. මෙලෙස දින ගණන්, සති ගණන් ගෙවෙද්දී තමන්ට තමන්ව පාලනය කරගන්නට හැකි වූ දවස් සඳහා ඔබම ඔබට තරු ලකුණු දීමේ ක්‍රමයක් ආරම්භ කරන්න. එවිට ඔබ ගැන ඔබට අහිංසක සතුටක් අත්විඳිය හැකි වනු ඇත. බොහෝ අය කරන ආකාරයට දිනපතා බර කිරා බැලීමේ අවශ්‍යතාවයක් නැත.
බර අඩු කර ගැනීමේ දෙවන පියවර ව්‍යායාම ය. මේ සඳහා ඇවිදින මැෂින් එකක් ඉතා සුදුසු වුවත් ඔබට එය ගැනීමට අපහසු නම් දිනපතාම ඇවිදීම කළ යුතුය. ශරීරයේ බර එන්න එන්නම වැඩිවීම යනු, එන්න එන්නම අඩුවන්නේ ඔබගේ ආයුෂ යි. එනිසා බෙහෙත්වලට වැය වන මුදල් ඉතිරි කර ගනිමින් ව්‍යායාම් කරන්න. අඩු තරමින් පැය භාගයක්, විනාඩි විස්සක් පමණවත් සිරුරට හොඳින් දහඩිය දමනසේ එක වේගයකින් සතියට දින පහක්වත් ඇවිදින්න. ව්‍යායාම සඳහා ඇවිදීම යනු ඔහේ හෙමින් හෙමින් පාවෙමින් ඇවිදීම නොවන බව සිහි තබාගන්න. ඇවිදින මැෂින් එකක් වඩා සුදුසු වන්නේ එම වේගය ඒකාකාරීව නිශ්චිත කාලයක් තුළ පවත්වා ගැනීමට හැකි වන නිසා ය. ඔබ කාර්යබහුල අයෙකු විය හැකිය. ඔබ එසේ කාර්යබහුල වී සිටින්නේ ඔබේ පවුල වෙනුවෙන් හෝ සමාජය වෙනුවෙන් වන්නට පුළුවන. කවුරුන් වෙනුවෙන් ඔබ කුමන දේ කළත්, ඔබගේ ශරීරය වෙනුවෙන් පිනාඩි විස්සක්, පැය භාගයක් වැය කළ හැකි එකම පුද්ගලයා ඔබම බව අවබෝධ කර ගැනීම වටී.
කායික රෝග විශේෂඥ වෛද්‍ය උපුල් ද සිල්වා
ඉන්දු පෙරේරා