සේවය අත්හිටුවන ලද පොලිස්පති දේශබන්දු තෙන්නකෝන් මහතා අද ( 19) පෙරවරුවේ මාතර මහෙස්ත්‍රාත් අධිකරණයට ඉදිරිපත් කිරීමෙන් අනතුරුව හෙට ( 20) දක්වා රක්ෂිත බන්ධනාගාරගත කර තිබේ.තෙන්නකෝන් මහතා අද උදෑසන සිය නීතිඥවරුන් සමඟ අධිකරණය වෙත භාරවීමෙන් අනතුරුව මාතර මහෙස්ත්‍රාත්වරයා විසින් ඔහු රක්ෂිත බන්ධනාගාරගත කරන ලෙස නියෝග කර ඇත.වැලිගම ප්‍රදේශයේ ප්‍රකට හෝටලයක සිදුවූ වෙඩි තැබීමක් සම්බන්ධයෙන් තෙන්නකෝන් මහතාට එරෙහිව වරෙන්තුවක් නිකුත් කර තිබූ අතර ඒ අනුව ඔහු අත්අඩංගුවට ගැනීම සඳහා විවෘත වරෙන්තුවක් නිකුත් කර තිබිණි.තවද දේශබන්දු තෙන්නකෝන් මහතාගේ ඇප අයදුම්පත සම්බන්ධයෙන් තීරණය හෙට දිනයේදී ප්‍රකාශයට පත් කරන බව අධිකරණය වැඩිදුරටත් දැනුම් දී ඇත.2023 වසරේ සිදු වූ මෙම සිද්ධියට අදාළව තෙන්නකෝන් මහතාට එරෙහිව අත්අඩංගුවට ගැනීමේ වරෙන්තුවක් නිකුත් කර තිබුණ ද, ඔහු අත්අඩංගුවට ගැනීම මෙතෙක් මඟහරවා තිබිණ.මීට අමතරව, තෙන්නකෝන් මහතා තමන් අත්අඩංගුවට ගැනීම වැළැක්වීමට නියෝගයක් ඉල්ලා අභියාචනාධිකරණයට පෙත්සමක් ඉදිරිපත් කර තිබුණ ද,එම පෙත්සම අභියාචනාධිකරණය විසින් ප්‍රතික්ෂේප කර තිබේ.