බිත්තර සඳහා පාලන මිලක් නියම කරමින් පාරිභෝගික කටයුතු පිළිබඳ අධිකාරිය පනවා තිබූ ගැසට් නිවේදනය අත්හිටුවීමට තීරණය කිරීමෙන් පසු වෙළෙඳපොළේ බිත්තර මිල ඉහළගොස් තිබේ.
අදාළ ගැසට් නිවේදනය පෙබරවාරි 06 වැනිදා දක්වා අත්හිටුවීමට අභියාචනාධිකරණය ඊයේ (15) තීරණය කිරීමත් සමග එතෙක් රුපියල් 50ට අලෙවි වූ බිත්තර මිල ඉහළ ගොස් ඇති බව වාර්තා වේ.
මේ අතර රුපියල් 10ත් 20ත් අතර අගයක පැවති බිත්තර මිල මාස කිහිපයක් තුළ රුපියල් 50 සීමාව ඉක්මවා අලෙවි කිරීම හේතුවෙන් වෛද්‍ය නිර්දේශ මත බිත්තර ආහාරයට ගතයුතු තැනැත්තන්ට මෙන්ම දරුවන්ට පෝෂණ අවශ්‍යතා සපුරා ගත නොහැකි බව ජනතාව පවසයි.
එසේම මෙරට ඉහළ ගොස් ඇති මන්දපෝෂණයෙන් දරුවන් මුදාගැනීම සඳහා ප්‍රෝටීන අධික ආහාරයක් වන බිත්තර දරුවන්ට ලබාදීම අත්‍යාවශ්‍ය බව වෛදවරුන් ද මේ වනවිට නිර්දේශ කර තිබේ.