රටක් ලෙස ගොඩනැඟීමට ශක්තිමත් ආර්ථිකයක් ඇති කිරීමට මෙවර අය-වැයෙන් මූලික පියවර තැබූ බව ජනාධිපති අනුර කුමාර දිසානායක මහතා ප්‍රකාශ කළේය.
පැවති පාලනයන්ගේ වැරදි මූල්‍ය කළමනාකරණය හේතුවෙන් බංකොලොත්භාවයට පත්වූ රට මේ වනවිට පවතින්නේ ජාත්‍යන්තර මූල්‍ය අරමුදල වැඩසටහනේ යම් පරිවාසයකට යටත්ව බව ද ජනාධිපතිවරයා කීවේය.
ජනාධිපතිවරයා මේ අදහස් පළ කළේ, කොළඹ සිනමන්ඩ් ලයිෆ් හෝටලයේ ඊයේ (19) පැවති 2025 පශ්චාත් අය-වැය කතිකාවතට එක්වෙමිනි.
ණය ප්‍රතිව්‍යුහගතකරණයෙන් ණය ගෙවීමට ගත් වසර තුනක විරාම කාලය හොඳින් උපයෝගී කර නිවැරදි ආර්ථික කළමනාකරණයකින් 2028 වන විට ණය ගෙවීමේ ශක්‍යතාවක් ඇති කිරීමට රජය අපේක්ෂා කරන බව ද ජනාධිපති අනුර දිසානායක මහතා කියා සිටියේය.
බංකොලොත්භාවයට පත් වූ රටක් නැවත ගොඩනැඟීමට ලෝකයේ බොහෝ රටවලට දශකයක් ගත වී ඇති නමුත් ශ්‍රී ලංකාවට ඉන් මිදීමට දශකයට වඩා අඩු කාලයක් ගතවේයැයි පුරෝකථනය කළ හැකි බවත් මෙහිදී ජනපතිවරයා පැවසීය.
රාජ්‍ය ආදායම දළ දේශීය නිෂ්පාදනයෙන් 15.1%ක් දක්වා වර්ධනය කිරීමට මෙවර අය-වැය මඟින් යෝජනා කර තිබෙන බවත් ප්‍රමුඛතා හඳුනාගෙන මුදල් වැය කිරීම රජයේ අපේක්ෂාව බවත් ජනාධිපතිවරයා සඳහන් කළේය.