ලෝක බැංකුවේ දකුණු ආසියා කලාපයේ සෞභාග්‍යය පිළිබඳ කලාපීය අධ්‍යක්ෂ මැතිව් වර්ගිස් මහතා අග්‍රාමාත්‍ය කාර්යාලයේදී අග්‍රාමාත්‍ය ලේකම් ප්‍රදීප් සපුතන්ත්‍රි මහතා හමුවී තිබේ.
ශ්‍රී ලංකාවේ වත්මන් ආර්ථික දැක්ම, දැනට ක්‍රියාත්මක ප්‍රතිසංස්කරණ සහ ලෝක බැංකුව සහ ශ්‍රී ලංකා රජය අතර සහයෝගීතාව වැඩිදියුණු කිරීමේ මාර්ග පිළිබඳව මෙම හමුවේදී සාකච්ඡා කෙරුණි.
සාකච්ඡා අතරතුර, ලෝක බැංකු නියෝජිත පිරිස ශ්‍රී ලංකාවේ ණය ප්‍රතිව්‍යුහගත කිරීමේ ක්‍රියාවලියේ ප්‍රගතිය පිළිබඳව කෘතඥතාව පළ කළ අතර, ආර්ථික ස්ථාවරත්වය සඳහා වූ ධනාත්මක පියවරක් ලෙස රජයේ 2025 වර්ෂයේ අයවැය කතාව අගය කරනලදි.
නියෝජිත පිරිස ඵලදායී ප්‍රතිපත්ති ක්‍රියාත්මක කිරීමේ වැදගත්කම අවධාරණය කළ අතර බාධාවකින් තොරව අන්තර් නියෝජිතායතන සම්බන්ධීකරණය සහතික කිරීම සඳහා අග්‍රාමාත්‍ය කාර්යාලයේ වැදගත් කාර්යභාරය අවධාරණය කරයි.
අග්‍රාමාත්‍ය ලේකම් සපුතන්ත්‍රි මහතා රජයේ ප්‍රමුඛතා පිළිබඳ දළ විශ්ලේෂණයක් ඉදිරිපත් කළ අතර 2025 වර්ෂයේ අයවැය සහ ආර්ථික ස්ථාවරත්වය, යහපාලනය සහ තිරසාර සංවර්ධනය කෙරෙහි කේන්ද්‍රගත වී ඇති බව සඳහන් කරයි.
ආයෝජන ප්‍රවර්ධනය කිරීම, වෙළඳාමට පහසුකම් සැලසීම සහ ඩිජිටල් පරිවර්තනය මෙහෙයවීම සඳහා රජයේ කැපවීම ඔහු පෙන්වා දෙනලදි.