ලබන වසර ( 2024) සඳහා වන අයවැය ලේඛනය වැඩි ඡන්ද 41 කින් පාර්ලිමේන්තුවේදී ඊයේ (13) පස්වරුවේ සංශෝධන සහිතව සම්මත විය.
පනත් කෙටුම්පතට පක්ෂව ඡන්ද 122 ක් ලැබුණු අතර ඊට විරුද්ධව ලැබුණේ ඡන්ද 81 ක් පමණි.එහි දී එක් මන්ත්‍රීවරයකු ඡන්දය ලබාදීමෙන් වැළකී සිටියේය.
පාර්ලිමේන්තුවේ දී ඊයේ (13) සම්මත කරන ලද 2024 වර්ෂය සඳහා වන විසර්ජන පනත් කෙටුම්පතට කථානායකවරයා සහතිකය ලබාදීමත් සමඟ එය 2023 අංක 34 දරන විසර්ජන පනත ලෙස බලාත්මක වන බව පාර්ලිමේන්තු සන්නිවේදන දෙපාර්තමේන්තුව සඳහන් කරයි.
පසුගිය නොවැම්බර් 13 වැනිදා 2024 වර්ෂය සඳහා වන අයවැය විසර්ජන කෙටුම්පත මුදල් අමාත්‍යවරයා ලෙස ජනාධිපති රනිල් වික්‍රමසිංහ මහතා විසින් පාර්ලිමේන්තුවට ඉදිරිපත් කළේය.
අනතුරුව නොවැම්බර් 21 වැනිදා දක්වා අයවැය දෙවැනි වර කියවීමේ විවාදය පැවති අතර, එදින පස්වරුවේ දෙවැනි වර කියවීමේ ඡන්ද විමසීම පැවැත්වූ අතර, එය වැඩි ඡන්ද 45කින් සම්මත විය.
අයවැය තෙවැනි වර කියවීමේ විවාදය නොවැම්ර් 22 වැනිදා සිට ඊයේ දිනය දක්වා පැවැත්විණි.