“මේ කාලේ කොයි තරම් සල්ලි හම්බ කළත් ජීවත් වෙන්න අමාරුයි”
මේ බොහෝ දෙනා පවසන පොදු කරුණකි. එනිසා වෙන කවදාටත් වඩා මේ කාලයේ අරපිරිමැස්ම ඉතා වැදගත් දෙයක් බවට පත්වී ඇත.
අරපිරිමැස්ම යනු නොකා නොබී ඉතිරි කිරීම නොවේ. ආර්ථිකය නිසි ලෙස කළමනාකරණය කිරීම ය. මෙය ටිකක් අමාරුය. නමුත් හිතන තරම්ම අමාරු නැත.
විවාහයට පෙර යුවළක් විවාහය පිළිබඳව මොනතරම් සැලසුම් හැදුවත් විවාහයෙන් පසු ආර්ථිකය කළමනාකරණය කරන අන්දම ගැන සැලසුම් කරන අය ඉතාමත්ම අඩු ය. එසේ නොකිරීම නිසාම බොහෝ ගැටලු සහගත තත්ත්වයන් ඇතිවෙයි. මේ නිසා විවාහයෙන් පසු ඇති විය හැකි විවිධ ගැටලුවලට විසඳුම් ලෙස බොහෝ දෙනා කරන්නේ මුදල් සොයා ගැනීම සඳහා විවිධ විකල්ප ක්‍රමවලට යොමු වීම ය.
උපදේශනවලට යොමු වන අය නිතර සඳහන් කරන එවැනි විකල්ප ක්‍රම කිහිපයක් සහ ඒවායෙහි තිබෙන අවාසි සහගත තත්ත්වය ගැන අපි දැන් විමසා බලමු.
* දෙමාපියන් වෙතින් යැපීම
උපයන මුදල් පවුලේ වියදම් සඳහා ප්‍රමාණවත් නොවන විට දෙමාපියන් වෙතින් මුදල් ලබාගන්නා විවාහක දරුවෝ සිටිති. හදිසි විශේෂ අවශ්‍යතාවයක් සඳහා මුදල් නැති විටෙක දෙමාපියන්ගෙන් ඉල්ලා ගැනීම වරදක් නොවේ. නමුත් තම පවුලේ වියදම් උදෙසා දෙමාපියන්ගෙන් මුදල් ඉල්ලා ගැනීම අනුමත කළ නොහැකි දෙයකි. මෙයින් දෙආකාරයක අයහපතක් සිදු වනු ඇත. එකක් නම් දෙමාපියන්ගෙන් නොවැරදීම මුදල් ලැබෙන නිසා දරුවන්ට ජීවිතය පිළිබඳ හෝ මුදල්වල අගයක් නොදැනීම ය. මුදල් වල අගය දැනෙන්නේ මහන්සි වී මුදල් උපයන අයට ය.
මෙයින් සිදු වන අනෙක් අවාසිය නම් විවාහක යුවළක් ලෙස ඔවුන්ගේ ස්වාධීනත්වය නැතිවීමයි. මෙහි දී දෙමාපියන්ට හැඟෙන්නේ තමන් තවමත් දරුවන් පෝෂණය කරන බවය. එවිට නිතරම දරුවන්ගේ දේවල් සොයා බැලීමට සහ ඒවාට ඇඟිලි ගැසීමට දෙමාපියන් නිරායාසයෙන්ම පෙළඹෙනු ඇත. එම දරුවන්ට සිදුවන්නේ විවාහ වී දෙමාපියන්ගෙන් වෙන්වූ පසුවත් දෙමාපිය අණසක යටතේ ජීවත් වන්නට ය. එය විවාහක යුවළකට මිහිරි අත්දැකීමක් වන්නේ නැත.
* විදේශ ගතවීම
මෙය අයහපත් දෙයක් නොවේ. නමුත් මේ තුළ සැලසුමක් තිබිය යුතුය. එසේ නොවුණොත් විදේශගතවීම නිසා මුදල් ලැබුණත් නැති ප්‍රශ්න ඇති වේ. එනිසා තමන්ගේ සහ පවුලේ අයගේ ජීවිතවලට යහපතක් උදාකර ගත හැකි ආකාරයට සැලසුම් සකස් කරගෙන විදේශගත වීම තුළින් උපයන මුදල් නිකරුනේ වියපැහැදම් වීම වළක්වා ගත හැකිය.
* ණයට මුදල් ගැනීම
කිසියම් විශේෂ හේතුවකට මුදල් අවශ්‍ය වූ විට ණය ගැනීම සාමාන්‍ය තත්ත්වයකි. නමුත් කෑම බීම වැනි එදිනෙදා වියහියදම් සඳහා ණය වීම සුදුසු දෙයක් නොවේ. එසේම ක්‍රෙඩිට් කාඩ් වලට බඩු ගැනීම ද බොහෝ දෙනෙක් අමාරුවේ වැටෙන දෙයකි. ඒ මොහොතේ තමන්ගේ අතින් මුදල් වියදම් වීමක් සිදු නොවන නිසා දකින දකින දේවල් සහ අවශ්‍ය අනවශ්‍ය හැමදේම ක්‍රෙඩිට් කාඩ් මගින් මිලදී ගැනීමට බොහෝ දෙනෙක් පුරුදු වී හිඳිති. මෙය හරියටම කිවහොත් අපේ ගැමියන් ගමේ කඩෙන් පොතට බඩු ගැනීම හා සමාන වූවකි.
එසේ නම් කුමක් කළ යුතුද?
මුලින්ම කළ යුත්තේ වියදම් කිරීම සම්බන්ධ ප්‍රමුඛතාවයන් හඳුනා ගැනීමය. ඒ ප්‍රමුඛතාවයන් කොටස් තුනකට බෙදෙයි.
1. අත්‍යවශ්‍ය
2. අවශ්‍ය
3 . අවශ්‍ය වුවත් දැනට අවශ්‍ය නොවන
වශයෙනි.
ඒ අනුව වියදම් කළ යුත්තේ මොනවාටද? යන්න ගැන මුලින්ම සිතා බලන්න. අනවශ්‍ය වියදම් කපා හැර ඉහත සඳහන් කළ ප්‍රමුඛතා ලැයිස්තුවට අනුව වියදම් ලැයිස්තුව සකසා ගන්න. ගෙවීමේ ක්‍රමයට බඩු ගැනීම සහ ක්‍රෙඩිට් කාඩ් මගින් බඩු ගැනීම තුළ ප්‍රමුඛතාවයන් යටපත්වී ආශාවන් ඉස්මතු වේ. ප්‍රමුඛතාවයන් සැලසුම් කිරීමට අවශ්‍යතාවයන් හඳුනා ගත යුතුය. අවශ්‍ය දේවල්වල වුවද මුලින්ම අවශ්‍ය දේ තෝරා බේරා ගත යුතු වෙයි. එවිට දැන්ම අවශ්‍ය නොවන දේවල් පසුවට කල් දමා ගත හැකිය. මිනිසුන්ගේ අවශ්‍යතාවන් සම්බන්ධයෙන් මහත්මා ගාන්ධි මෙබඳු දෙයක් පවසා තිබේ.
” සම්පත් වැඩි වන්නේ නැත. නමුත් අවශ්‍යතාවයන් වැඩි වේ. එනිසා සම්පත් වැඩිකර ගන්නට නොව උත්සාහ කළ යුත්තේ අවශ්‍යතා අඩු කර ගැනීමටය. නැතහොත් සීමිත සම්පත්වලින් අපට සැනසුමක් ලද නොහැකි වනු ඇත.”
අපතේ යාම වළක්වා ගැනීම
අපතේ යන්නේ මුදල් පමණක් නොවේ. තවත් බොහෝ දෑ අපතේ යයි. විදුලිය සහ ජලය මෙන්ම ආහාර ද අපගේ නොසැලකිල්ල මත බොහෝ විටම අපතේ යනු ඇත. සමහරු ඉතිරි වන ආහාර ඉවත දැමීම අපරාධයක් යැයි කියමින් ඒවාට තවත් නොයෙකුත් දෑ එකතු කරමින් වෙනත් ආහාර සකසන්නට ගොස් තව තවත් වියදම් වැඩි කර ගනිති. විකල්ප ක්‍රම අනුගමනය කරන්නට ගොස් නාස්තිය වැඩි කර ගන්නවාට වඩා ඔබේ අවශ්‍යතාවයට සරිලන අයුරින් කෑමබීම පිළියෙළ කර ගැනීම වඩාත් හොඳ ය.
සුපිරි වෙළඳසල්වලින් බඩු මිලදී ගැනීමට යාමට පෙර මිලදී ගත යුතු බඩු ලැයිස්තුව ඔබේ අවශ්‍යතාව අනුව සකසා ගන්න. මෙවැනි ස්ථානවලින් බඩු ගැනීමට යාමේදී ඔබ තුළ හොඳ විනයක් තිබිය යුතුය. ඒ අන් කිසිවකට නොව ඔබව, ඔබටම හසුරුවා ගැනීමටය. එවිට දකින දකින අනවශ්‍ය බඩු මිලදී ගැනීමට ඔබට නොසිතෙනු ඇත.
බඩු මිලදී ගත යුත්තේ කොපමණ දින ගණනකට සෑහෙන පරිදි ද යන්න ගැනත් ක්‍රමවේදයක් සකසා ගත යුතු වෙයි. වියදම් වූ දේවල් ලියා තබා ගන්නවාටත් වඩා සුදුසු වන්නේ, වියදම් කරන්නට අවශ්‍ය කරන දේවල් වෙනම ලියා ගැනීම ය. නිවසේ නොවැරදීම ඔබ ගෙවිය යුතු ජල, විදුලි, දුරකථන බිල්පත්, දරුවන්ගේ අධ්‍යාපන කටයුතුවලට වෙන් කරන මුදල්, කෑම බීම සඳහා වෙන් කරන මුදල් යන මේ සියල්ල වෙනම සටහන් කර ගැනීම සුදුසුය. එවිට ඔබට එම ලැයිස්තුවට අනුව මුදල් වියදම් කළ හැකිය.
ඔබේ අයවැය ඇස්තමේන්තුවෙහි අනිවාර්යෙන්ම තිබිය යුතු දෙයක් වන්නේ කීයක් හෝ ඉතිරි කර ගැනීමය. ඉතිරි කිරීම පුරුද්දක් කර ගත යුතුය. ඉතිරි කළ හැක්කේ බැංකුවේ මුදල් තැන්පත් කිරීමෙන් පමණක් නොවේ. රූපවාහිනිය රිමෝට් කොන්ට්‍රෝලයෙන් නොව, ස්වීචයෙන්ම නිවා දැමීම තුළ ද ඔබේ විදුලි බිලෙන් යම් මුදලක් ඉතිරි කරගත හැකිය. අනවශ්‍ය ලෙස විදුලි පහන් නොදල්වා සිටීම ද ඉතිරියකි. සුළුවෙන් හෝ ඉතිරි කරන දෙයක් තුළින් ඔබට පුදුමාකාර මානසික සහනයක් දැනෙනු නිසැකය. ණය බර යනු මනසට විශාල පීඩනයකි. එය මුළු ජීවිතය පුරාම ඔබට බලපෑම් ඇති කරවයි. ඒ පීඩනය අඩු වූ කල සිතට ලොකු සතුටක් දැනෙනු ඇත. අරපිරිමැස්මේ වටිනාකම එයයි.
මනෝවිද්‍යා උපදේශක ආචාර්ය සුරංග අමරකෝන්
ඉන්දු පෙරේරා