නැති වූ ගිරවකු සොයා ගැනීම සඳහා ලංකාවේ මුදලින් රුපියල් ලක්‍ෂ 4 කට සමාන තෑගි මුදලක් පිරි නැමූ අපූරු පවුලක් ගැන පුවතක් පසුගිය දා මාධ්‍ය තුළ අවධානයක් දිනාගෙන තිබුණා. මෙම සිද්ධිය වාර්තා වී තිබුණේ ඉන්දියාවේ කර්ණාටක ප්‍රාන්තයෙන්.
ව්‍යාපාරිකයකු වන අර්ජුන් ෂෙට්ටිත්, ඔහුගේ බිරිඳ සහ සත් හැවිරිදි පුතාත් අප්‍රිකානු අළු ගිරවුන් නැමැති වර්ගයට අයත් ගිරා යුවළක් බැංගලෝරයෙන් මිල දී ගෙන තිබුණේ මෙයට වසර තුනකට පෙර යි. තම පවුලේ උදවිය මෙම ගිරා ජෝඩුවට සැලකුවේ පවුලේම සාමාජිකයන් දෙදෙනකුට හා සමානව බවයි අර්ජුන් පවසන්නේ. ‘ඒ දෙන්නා අපේ පවුලේම අය හැටියටයි අපි සැලකුවේ. කොටින්ම ඔවුන් කූඩුවක හිර කරලා තියන්නවත් අපිට හිතුණේ නැහැ’ ඔහු සඳහන් කර තිබුණා. ඒ නිසා රස්ටොමා නැමැති පිරිමි ගිරවාත්, රියෝ නැමැති ඔහුගේ ආදරවන්තියත් නිවස තුළ ඉතා නිදහසේ හැසිරුණු බව ඔවුන් පවසනවා. නිවැසියන්ගේ විවිධ ශබ්ද ඉතා දක්‍ෂ ලෙස අනුකරණය කිරීමටත් ඔවුන්ට හැකියාව තිබූ බව සඳහන්.
කෙසේ හෝ වේවා, පසුගිය දිනෙක ෂෙට්ටි පවුලේ අය අලුත් ගෘහ භාණ්ඩ වාගයක් නිවසට ගෙන ආ අවස්ථාවක විවර කර තිබූ fදාරෙන් රස්ටොමා පිටතට පියඹා ගොස් තිබුණා. එයින් පසු ඔවුන්ට මේ අපූරු සුරතලා දකින්නට ලැබුණේ නැහැ. මේ නිසා පවුලේ අය සිටියේ දැඩි සිත් වේදනාවෙන්. ඔවුන් හැමෝටම වඩා දුකෙන් පසු වුණේ රස්ටොමාගේ සහකාරිය වන රියෝ යි. ‘රියෝ කෑම කන එක පවා නතර කළා’ යයි අර්ජුන් පවසා තිබුණා.
මෙම තත්ත්වය තුළ කෙසේ හෝ රස්ටොමා නැවත සොයා ගැනීමට ෂෙට්ටි පවුල තීරණය කළා. රස්ටොමා ගේ ඡායාරූපයක් ඇතුළත් පෝස්ටරයක් මුද්‍රණය කිරීමට අර්ජුන් පියවර ගත් අතර ඔවුන් ජීවත් වන තුමකුරු නැමැති ප්‍රදේශය පුරා ගමන් කරමින් එම පෝස්ටර් ඇලවීමටත් ඔහු මහන්සි වී තිබුණා. එපමණක් නොවෙයි, ත්‍රීරෝද රථවල ශබ්ද විකාශන යන්ත්‍ර බැඳගෙන ගිරවා සොයා දෙන ලෙස නිවේදනය කරමින් ගිය බවත් පැවසෙනවා. පෝස්ටර් මුද්‍රණය සඳහාත්, ඉහත කී ත්‍රීරෝද රථ සඳහාත් ඔහුට ලොකු මුදලක් වැය කරන්නට සිදු වී තිබුණා. ඊට අමතරව මෙම සුරතලා සොයා දෙන කෙනෙකුට ඉන්දියානු රුපියල් 50,000 ක තෑග්ගක් දෙන බවත් පෝස්ටරයේ සඳහන් වුණා. එය ලංකා මුදලින් රුපියල් 230,000 කට ආසන්නයි.
මේ සියල්ල මේ ආකාරයෙන් සිදු වෙද්දී රස්ටොමා සිට ඇත්තේ ඔහුගේ නිවසේ සිට කි.මී. 3 ක් තරම් දුරකයි. මුලින්ම ඔහු හමු වී තිබුණේ ක්‍රිෂ්ණමූර්ති නැමැති කම්කරුවකුට. ඒ වනවිට රස්ටොමා උස් ගසක් මුදුනට වී සිටි බවත්, බල්ලන්ගෙන් සහ බළලුන්ගෙන් බේරීම සඳහා එසේ සිටින්නට ඇති බවත් ක්‍රිෂ්ණමූර්ති පවසා තිබුණා. බියත්, කුසගින්නත් නිසා ඔහුගෙන් මලානික සහ වෙහෙසට පත් ගතියක් දිස් වූ බවයි ක්‍රිෂ්ණමූර්ති තවදුරටත් පවසා තිබුණේ. කෙසේ නමුත් තමා ගිරවා අසළට ගිය විට ඔහු කිසිදු පැකිලීමකින් තොරව තමා වෙත පැමිණි බව ද ඔහු කියා තිබුණා. පසුව ක්‍රිෂ්ණමූර්ති මෙම අලංකාර සුරතලා රැක බලා ගැනීම පවරා තිබුණේ ශ්‍රීනිවාස් නැමැති මිතුරකුටයි.
ඊට දින දෙක තුනකට පසු ඔවුන්ට අර්ජුන් විසින් අලවනු ලැබූ පෝස්ටරයක් දැකගන්නට ලැබුණු අතර ඔවුන් ඒ අනුව අර්ජුන්ට දුරකතන ඇමතුමක් ලබා දී තිබුණා.
තමා ගිරවා ලබා ගැනීම සඳහා යද්දී රස්ටොමා තම කුඩුව තුළ ශෝකබරිත ආකාරයෙන් සිටිනු දකින්නට ලැබුණු බව අර්ජුන් පවසනවා. ‘නමුත් මාව දැකපු ගමන් ඔහු හැසිරුණු ආකාරය ඔබ දකින්නයි“ තිබුණේ’ අර්ජුන් මාධ්‍යවේදියකු සමග සඳහන් කර තිබුණා. ‘එයා ප්‍රීතියට පත් වූ අවස්ථාවල නගන විදියේ ශබ්ද නගමින් මහ හඬින් කෑ ගහන්න පටන් ගත්තා’.
තම සුරතලා නැවත දැක ගන්නට ලැබීමෙන් අර්ජුන් ද කෙතරම් සතුටට පත් වුණාද කියතොත් පෝස්ටර්වල ඔහු සඳහන් කළ ඉන්දියානු රුපියල් 50,000 වෙනුවට 85,000 ක් ම ක්‍රිෂ්ණමූර්තිට සහ ශ්‍රීනිවාස්ට පිරිනැමීමට නිර්ලෝභී වුණා. එය ලංකා රුපියල් ලක්‍ෂ 4 කට ආසන්න මුදලක්.
රස්ටොමා නැවත නිවසට පැමිණීම ගැන පවුලේ සියලු දෙනා තුළම ඇති වුණේ මහත් සතුටක්. නමුත් රියෝ තරම් වෙන කිසිවෙකුත් සතුටට පත් වන්නට නැතිව ඇති. කෙසේ නමුත් ගිරවුන් දෙදෙනා තම නිවසට වඩා නිදහස් (සත්වෝද්‍යානයක් වැනි) තැනකට යැව්වහොත් ඔවුන් මීට වඩා සතුටෙන් ජීවත් වේවිද යන්න ගැනත් ෂෙට්ටි පවුල කල්පනා කරනවා. ‘මව්පියන් වුණත් තම දරුවන්ව වඩා හොඳින් ඉගෙන ගන්නත්, හොඳින් ජීවත්වෙන්නත් පිටරටවලට එහෙම යවනවනෙ’ අර්ජුන් පවසා තිබුණා. ‘වෙන තැනක ඔවුන්ට මීට වඩා සතුටින් ජීවත් වෙන්න හැකි නම් අපි ඔවුන්ගෙන් ඈත් වෙන්න සූදානම්.’
නිහාල් පීරිස්