තමන් ජනපති පදවියට පත් වූ පසු තම ආණ්ඩුවක් යටතේ වසර තුනක් ඇතුළත වංචාව සහ දූෂණය අවසන් කරන බව ශ්‍රී ලංකා පොදුජන පෙරමුණේ ජනාධිපතිධූර අපේක්ෂක, පාර්ලිමේන්තු මන්ත්‍රී නාමල් රාජපක්ෂ මහතා පවසයි.රටේ සංවර්ධන ක්‍රියාදාමය වඩා කාර්යක්ෂමව සහ විනිවිද භාවයෙන් ක්‍රියාත්මක කරමින් එසේ කළ හැකි බව ද ඒ මහතා කියයි.වංචාව සහ දූෂණය ඇතැමුන්ගේ සටන් පාඨයක් බවට පත්වුවද එය අවසන් කිරීමට අවශ්‍ය ක්‍රියාමාර්ග තමන්ට ගත හැකි බව පවසන ඒ මහතා රට ගොඩනැගීමට හැකි සහ උවමනාවක් තිබෙන දේශපාලන බලවේගය ශ්‍රී ලංකා පොදුජන පෙරමුණ බව ද සඳහන් කරයි.ශ්‍රී ලංකා පොදුජන පෙරමුණේ ජනාධිපතිධූර අපේක්ෂකයා ලෙස එම පෙරමුණේ ප්‍රතිපත්තිමය ඉලක්කය සහ නව්‍යකරණ වැඩපිළිවෙල ඇතුළත් “නාමල් දැක්ම” ප්‍රතිපත්ති ප්‍රකාශය එළිදැක්විමේ අවස්ථාවට එක්වෙමින් ඒ මහතා මේ බව සදහන් කළේය.පිටු 45 කින් සමන්විත එම ප්‍රතිපත්ති ප්‍රකාශය ‘නාමල් දැක්ම’ ලෙස නම් කර ඇති අතර 2025 – 2035 දක්වා එම පක්ෂයේ වැඩපිළිවෙල “ඔබ වෙනුවෙන් දියුණු රටක්” යන තේමාව යටතේ ඉදිරිපත්කර තිබේ.ශ්‍රී ලංකා පොදුජන පෙරමුණේ නායක සහ හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන් පැවැති මෙය කොළඹ ITC රත්නදීප හෝටලයේ දී අද (02) පෙරවරුවේ පැවැත්විණි.