දැදුරු ඔය ජලාශයේ මත්ස්‍ය සම්පත වනසන ආක්‍රමණික මත්ස්‍යයා දේශීය මත්ස්‍යයකු වන ලූලා අයත් මත්ස්‍ය කාණ්ඩයේම දරුණු ආක්‍රමණශීලී channa micropeltes (Giant snakehead) නම් මත්ස්‍ය ප්‍රභේදය බව ජාතික ජලජ සම්පත් පර්යේෂණ හා සංවර්ධන නියෝජිත ආයතනය (නාරා) මඟින් තහවුරු කර ඇත.අග්නිදිග ආසියාව නිජබිම කරගත් මාංස භක්ෂක මිරිදිය මත්ස්‍යයකු වන මේ මත්ස්‍යයා කි.ග්‍රෑ. 20ක් පමණ වර්ධනයක් දැකිය හැකි බවත් ශීඝ්‍රයෙන් තම වර්ගයා බෝ කරන්නකු බවත් නාරා ආයතනයේ ප්‍රධාන මත්ස්‍ය විද්‍යාඥ රමණි ශිරන්තා මෙනවිය සඳහන් කරයි.මේ නිසා ජලාශයේ සිටින අනෙකුත් මත්ස්‍යයන්ට දැඩි තර්ජනයක් ඇති වන බව ද නාරා ආයතනය තහවුරු කර තිබේ. එමෙන්ම ධීවරයන් සඳහන් කර ඇත්තේ මේ හේතුවෙන් ජලාශයේ සෑම ධීවර තොටුපොළකම ධීවරයන්ගේ දිනක මත්ස්‍ය අස්වැන්නට මෙම මත්ස්‍යයා මඟින් බලපෑම් එල්ල වන බවයි.එමෙන්ම මෙම මත්ස්‍යයා නිසා මිරිදිය ධීවර කර්මාන්තයට එල්ලවන බලපෑම අවම කර ගැනීමට මත්ස්‍යයාගේ ව්‍යාප්තිය පාලනය කිරීමේ ක්‍රියාමාර්ග සම්බන්ධයෙන් නාරා ආයතනය කරුණු අධ්‍යයනයක් සිදු කෙරෙන බව ද ඇය පවසයි.