මධ්‍යම කඳුකරයට ඇදහැලෙන වර්ෂාවත් සමඟ පොල්ගොල්ල ජලාශයේ වාන්දොරටු 5ක් විවෘත කර තිබේ.
එමගින් තත්ත්පරයට ඝණ අඩි 17,500ක් ජලය මුදා හැරෙන බැවින් ජලාශයේ පහළ කොටස භාවිත කරන ජනතාව ඒ පිළිබඳ අවධානයෙන් සිටින ලෙසට යි කාර්යභාර ඉංජිනේරුවරයා ඉල්ලීමක් කරන්නේ.
ලක්ෂපාන ජලාශයේ වාන්දොරටු 3ක් සහ කැනියොන් ජලාශයේ වාන්දොරටුවක් අගල් 3 බැගින් විවෘත කර ඇත.
නිරිත දිග මෝසම සක්‍රිය වීම හේතුවෙන් රට තුල පවතින අයහපත් කාලගුණ තත්වය නිසා දිස්ත්‍රික්ක අටක ප්‍රාදේශිය ලේකම් කොට්ඨාස 41 කට නාය යෑමේ අවදානමක් ඇතැයි ජාතික ගොඩනැගිලි පර්යේෂණ සංවිධානය නිවේදනය කරයි.
කොළඹ, කළුතර, මහනුවර කෑගල්ල කුරුණෑගල මාතලේ නුවරඑළිය, සහ රත්නපුර යන දිස්ත්‍රික්කවල ප්‍රාදේශිය ලේකම් කොට්ඨාස 41 කට මෙසේ නායයෑමේ අවදානම් නිවේදන නිකුත් කර ඇති අතර එයින් දිස්ත්‍රික්ක පහක ප්‍රාදේශිය ලේකම් කොට්ඨාස 11 කට රතු නිවේදෙන නිකුත් කරනු ලැබ තිබේ.
මහනුවර දිස්ත්‍රික්කයේ උඩදුම්බර, කෑගල්ල දිස්ත්‍රික්කයේ රඹුක්කන, කෑගල්ල රුවන්වැල්ල, යටියන්තොට බුලත්කොහුපිටිය, සහ මාවනැල්ල, කුරුණෑගල දිස්ත්‍රික්කයේ මල්ලවපිටිය, නුවරඑළිය දිස්ත්‍රික්කයේ අඹගමුව සහ රත්නපුර දිස්ත්‍රික්කයේ කුරුවිට සහ කලවාන යන ප්‍රාදේශිය ලේකම් කොට්ඨාස සඳහා රතු නිවේදන නිකුත් කරනු ලැබ තිබේ.