යොහානි ද සිල්වා යොවුන් ගායිකාව ගැයූ ‘මැණිකේ මගේ හිතේ’ ගීතයට මේ වන විට අන්තර් ජාලය ඔස්සේ ලොව පුරා අති මහත් ප්‍රසිද්ධියක් හිමිව තිබේ.
මේ වන විට අන්තර් ජාල යූ ටියුබ් වෙබ් අඩවිය මගින් එම ගීතය අසා ඇති පිරිස මිලියන එකසිය විස්සකට ආසන්න වෙයි. එය අප රටේ සමස්ත ජනගහනයෙන් හය ගුණයකට ආසන්න සංඛ්‍යාවකි.
යොහානි ද සිල්වා යොවුන් ගායිකාව ශ්‍රී ලාංකේය ගායක ගායිකාවන් අතරේ ජනප්‍රියතම තලයක වැජඹුණු ගායිකාවක් ද නොවේ. බොහෝ දෙනකු ඇගේ නම දැන ගත්තේ ද මෙම ගීතයට ලැබුණු අතිමහත් ප්‍රසිද්ධිය හේතුවෙනි. එවන් ගායිකාවක ගේ ගීතයක් එක් වරම ලෝකයේ මේ සා අති විශාල පිරිසක ගේ අවධානයට ලක්වීම එක්තරා හාස්කමකැයි බොහෝ දෙනෙක් සිතති.
මානව ඉතිහාසය බොහෝ දුරට ක්‍රමික විකාශනයකින් යුතු වූවකි. එහෙත්, ඒ විකාශන රටාවට පරිබාහිර අසිරිමත් හා අරුමැසි සංසිද්ධීන් ද වරින් වර මානව ඉතිහාසයට එක් වෙයි. ඉන් කොටසක් සම්ප්‍රදායන් සහ සංස්කෘතීන් එම ක්‍රමික විකාශන ධාරාවටම එක් වන අතර තවත් කොටසක් හුදු ‘ප්‍රපංච’වශයෙන් සමාජගත වී කාලයාගේ ඇවෑමෙන් නිශේධනය වෙයි.
මැණිකේ මගේ හිතේ ගීතය සහ එය ගැයූ යොහානි ද සිල්වා ගේ ගායන ජීවිතයේ ඉදිරිපැවැත්ම ඉහත සඳහන් දෙයාකාර කරුණු වලින් එකක් විය හැක. එබැවින් අපට ඒ පිළිබඳව දැන්ම කිසිවක් කිව නොහැක.
මැණිකේ මගේ හිතේ ගීතයට ජාත්‍යන්තර වශයෙන් මෙතරම් ප්‍රසිද්ධියක් ලැබීමට ආසන්න හේතුවක් ලෙස බොහෝ දෙනකු දකිනුයේ භාරතීය සුපිරි නළු අමිතාභ් බච්චන් ගේ ට්විටර් ගිණුමෙහි ඔහු 1981 වසරේ රඟපෑ කාලියා චිත්‍රපටයේ රංගනයක පසුබිම් ගීතය ලෙස එම ගීතය එක් කොට තිබීම මුල් කොට ගත් සිද්ධියකි.
අමිතාභ් ගේ දියණිය වන ස්වේතාගේ විසිහතර හැවිරිදි දියණිය; නව්‍යා නවේනි අන්තර්ජාලයට එක්කොට තිබූ එම නිර්මාණාත්මක ඉදිරිපත් කිරීම කෙරෙහි අමිතාභ් ද වශීකෘත වී තිබේ.
එමගින් ඔහු පවසා ඇත්තේ ඒ ගීතය කොතෙක් ඇසුවත් එපා නොවන්නක් බව ය.
භාරතීය සුපිරි නළු අමිතාභ් බච්චන් විශිෂ්ටතම රංගධරයකු සේම සංගීතය හා යාවජීව සම්බන්ධයක් ද ඇත්තෙකි. රංගනයට අමතරව තමන්ටම ආවේණික ශෛලියකට අනුව ගීත ගණනාවක් ගයා ඇති ඔහු උත්තර භාරතීය රාගධාරී සංගීතය ඇතුළු ඉන්දීය සංගීත සම්ප්‍රදායන් පිළිබඳ විධිමත් දැනුමක් ඇත්තකු බව ද පෙනේ.
ඉන්දියාවේ ඉහළ පෙළේ ගායන තරග වල විනිසුරුවරයකු ලෙස ද කටයුතු කොට ඇති ඔහු නව පරපුරේ ගායක ගායිකාවන් දෙස පිය සෙනෙහසකින් යුතුව දයාබර බැල්මක් හෙළන්නකු බව ද ඉන්දීය විචාරකයෝ කියති.
එහෙත් ඔහු තමන් ගේ සිත් නොගත් හෝ තමන්ට අභිමත නොවූ කිසිවක් අගය කළ අවස්ථාවක් ඇතැයි සිතිය නොහැක.
කිසියම් ගීතයක් ජනප්‍රිය වීම කෙරෙහි එහි පද රචනය, තනුව සහ ගායනය යන තුනම හෝ ඉන් එකක් වත් සුවිශේෂ තත්වයකින් තිබිය යුතු ය. දැනට ජනප්‍රියව පවතින සෑම ගීතයකින්ම ඉන් එක් අංගයක් ඉස්මතුව පෙනෙන අතර ඇතැම් විශිෂ්ට ගීත නිර්මාණ තුළින් ඒ අංග තුනම එක සේ ඉස්මතු වී පෙනෙයි.
යොහානි ද සිල්වා ගැයූ මැණිකේ මගේ හිතේ ගීතයේ තනුව හෙවත් ස්වර රචනය කිසියම් නිශ්චිත සංගීත ආරකට, සම්ප්‍රදායකට අනුව ප්‍රබන්ධ වී ඇති බවක් පෙනෙන්නට නැත.
නමුදු ඉතා සරල බවකින් යුත් එහි යම් ලයාන්විත බවක් ගැබ්ව තිබේ. මැණිකේ මගේ හිතේ ගීතය සිංහල බසින් ගැයෙන ලද්දක් වුවද එය ජාත්‍යන්තර තලයේ ජනප්‍රිය වීමට එහි පද රචනයේ ඇති ශබ්ද මාධුර්ය ද ඉවහල් වන්නට ඇතැයි මට සිතේ.
අරුත නොවැටහුණ ද එහි එන වදන් පෙළ ලොව බොහෝ ජාතීන්ට පහසුවෙන් උච්චාරණය කළ හැකි මට්ටමක තිබේ. එම ගීතය ගායනා කළ බොහෝ විදේශකයන් ද එම වදන් පෙළ අපහසුවකින් තොරව උච්චාරණය කරනු අන්තර් ජාල යූ ටියුබ් නාලිකාව ඔස්සේ නිරීක්ෂණය කළ හැක.
මා විශ්වාස කරන අන්දමට එම ගීතයේ සාතිශය ජනප්‍රියත්වයට හේතුව යොහානි ද සිල්වා එම ගීතය ගායනා කිරීමේ දී අනුගමනය කරන ලද සරල, නිදහස් ගායන ශෛලිය සහ ඇගේ කට හඬයි.
යොහානි ගැයූ තවත් ගීත කිහිපයක් අන්තර් ජලයෙන් නිරීක්ෂණය කළ හැකි වුවද ඇගේ කට හඬ ගායන ශෛලීය මැණිකේ මගේ හිතේ ගීතයේ තනුව හාපද රචනය සමඟ කදිමට සුසංයෝග වී තිබේ. මගේ පෞද්ගලික වැටහීම අනුව ඇගේ එම ගී ස්වරය තුළින් සංගීතවත් බවකටත් වඩා සුරතල් බවක් ඉස්මතුව තිබේ.
සුරතලය යනු මිනිසුන් තුළ සේම ඇතැම් තිරිසන් සතුන් තුළ පවා භාවාත්මක කම්පනයක් පුබුදු වන්නකි.එම ළයාන්විත අත්දැකීම් දෘශ්‍ය සේම ශ්‍රව්‍ය මාධ්‍යයන් ඔස්සේ ද අපට පසක් කර ගතහැකිය.
යොහානි ගැයූ මැණික් මගේ හිතේ ගීතයේ අරුත පසෙක තිබිය දී එම ගායනයේදී ඇය පළ කරන සුරතල් ගායන විලාසය එය ජාත්‍යන්තර තලය තෙක් ගෙන යාමට මහෝපකාරී වූ බව මගේ පෞද්ගලික වැටහීමය. ඒ අනුව එය සුගායනයක් නොවන්නේ යැයි කිව හැක්කේ කාටද?
මේ සඳහා මට දැක්විය හැකි කදිම නිදසුනක් නම් මෙම ගීතය කෙරෙහි කුඩා දරුවන් දක්වන ආකර්ෂණයයි. එය බහ තෝරන තෝරන දරුවන් ද කදිමට ගායනා කොට ඇති අන්දම අන්තර් ජාලය නිරීක්ෂණයෙන් මනාව වටහා ගත හැකි ය.
මේ සියලු තත්වයන් යටතේ දේශීය සංගීතයේ ප්‍රගමනය, ශ්‍රී ලාංකේය අනන්‍යතාව තහවුරු කරවීම ආදී සාම්ප්‍රදායික චින්තනයන් මත පදනම් වන කරුණු ප්‍රවර්ධනයෙහි ලා කෙසේ වෙතත් ශ්‍රී ලාංකේය යුවතියක ගේ මන පිනවන ගායනයක් ලෙස හෝ මෙම ගීතය ජාත්‍යන්තර තලයේ ජය කෙහෙළි නැංවීම ධනාත්මකව සැලකිය යුත්තකි. ඇයට, ඇගේඉදිරි ගමනට අපේ සුබ පැතුම් ද එක් කළ යුතුම වන්නේ එබැවිනි.
මානව විද්‍යා මහාචාර්ය ප්‍රණීත් අභයසුන්දර