ලොව පලමු වරට ඉන්දියාව කොවිඩ් 19 වෛරසයට එරෙහිව ඩී.එන්.ඒ. එන්නතක් නිෂ්පාදනය කර තිබෙන බව විදෙස් මාධ්‍ය වාර්තා කරයි.
නව මාදිලියේ මාත්‍රා තුනකින් යුත් මෙම කොවිඩ් 19 එන්නත සඳහා ඉන්දීය ඖෂධ පාලන අධිකාරියේ අනුමැතිය හිමි වී තිබේ.
ZyCoV-D යන නිල නාමයෙන් හැඳින්වෙන මෙම එන්නත නිපදවා ඇත්තේ ඉන්දියාවේ ගුජරාඨ ප්‍රාන්තයේ අහමදාබාද් නුවර පිහිටි ‘සයිඩුස් කැඩිලා (Zydus Cadila)’ ඖෂධ නිෂ්පාදන සමාගමයි.
මෙම ඖෂධ නිෂ්පාදන සමාගම ඉන්දීය ජෛව තාක්ෂණ දෙපාර්තමේන්තුව සමඟ ද එක් වෙමින් මෙම ඩී.එන්.ඒ. එන්නත නිපදවා ඇත.
පුද්ගලයන් 28,000ක් යොදාගෙන මෙම එන්නතේ සායනික පරීක්ෂණ සිදුකර ඇති අතර ඉන් සියයට 66කට වැඩි පිරිසකට එන්නත් කිරීමෙන් පසු රෝගය වැළඳී නො තිබීම විශේෂත්වයක් බව විදෙස් මාධ්‍ය වාර්තා කරයි.