හැරී පොටර් කතා මාලාවේ කාගේත් ආදරයට පාත්‍ර වූ රෑබියස් හැග්‍රිඩ් නම් චරිතය ජීවමාන කරනු ලැබූ රොබී කෝල්ට්‍රන් අද සිය ජීවන ගමන නිමා කරනු ලැබීය. මිය යන විට 72 හැවිරිදි වියේ පසු වූ ඔහු පසුගිය වසර දෙක පුරාම ඔස්ටියෝ ආතරයිටිස් රෝගයට ප්‍රතිකාර ලබමින් රෝහල් ගත වී සිට ඇත. ඔහු මිය ගොස් ඇත්තේ ලාබර්ට් හි ෆෝස් වැලී රෝයල් රෝහලේ දී බවට මාධ්‍ය නිවේදනය කර තිබේ.
වෘත්තීමය වශයෙන් ස්කොට්ලන්ත ජාතික විකට නළුවෙක් වූ ඔහු Harry Potter චිත්‍රපට මාලාවේ (2001-2011) Rubeus Hagrid චරිතයට අමතරව James Bond චිත්‍රපටවල GoldenEye (1995) සහ The World Is Not Enough (1999) හි Valentin Dmitrovich Zukovsky ලෙසත් ලොව පුරා පිළිගැනීමට ලක්විය. නාට්‍ය සඳහා ඔහු කළ සේවය වෙනුවෙන් II එලිසබෙත් රැජින විසින් 2006 අලුත් අවුරුද්ද සදහා OBE ගෞරව පුදනු ලැබීය.
1990 දී, කෝල්ටන් වෙත Evening Standard British චිත්‍රපට සම්මාන උළෙලේ Peter Sellers Award for Comedy සම්මානය හිමි විය.
කෝල්ට්‍රේන් සිය වෘත්තීය ජීවිතය ආරම්භ කළේ ඇල්ෆ්‍රෙස්කෝ (1983-1984) චිත්‍ර කතා මාලාවේ හියු ලෝරි, ස්ටීවන් ෆ්‍රයි සහ එමා තොම්සන් සමඟ පෙනී සිටීමෙනි. 1987 දී, ඔහු BBC miniseries Tutti Frutti හි තොම්සන් සමඟ රඟපෑ අතර, ඒ සඳහා ඔහු හොඳම නළුවා සඳහා ඔහුගේ පළමු බ්‍රිතාන්‍ය ඇකඩමි රූපවාහිනී සම්මානය ලබා ගත්තේය. 2006 දී, ඔහු ITV හි TV හි විශිෂ්ටතම තරු 50 දෙනාගේ මත විමසුමේදී මහජන ඡන්දයෙන් එකොළොස්වන ස්ථානයට පත් විය. 2016 දී ඔහු කොටස් හතරකින් යුත් චැනල් 4 කතා මාලාවේ නැෂනල් ට්‍රෙෂර් හි ජූලි වෝල්ටර්ස් සමඟ රඟපෑ අතර, ඒ සඳහා ඔහුට බ්‍රිතාන්‍ය ඇකඩමි රූපවාහිනී සම්මානය සදහා නාම යෝජනා ලැබුණි.
කෝල්ට්‍රන්ගේ විවාහය සිදු වූයේ ඔහුට වයස අවුරුදු 49 ක් පිරුණු පසු එනම් 1999 දෙසැම්බර් 11 දින දී ය. ඒ Rhona Gemmell සමඟිනි. ප්‍රසිද්ධි මාධ්‍යයේ පෙනී සිටීමට අකමැති රෝනා කුමන වෘත්තියක නියැලෙන්නියක් ද යන්න බව පවා දන්නේ ඔවුන්ගේ සමීපතමයන් පමණි. ඔහු විවාහ වන විටත් ඔහුට දාව රෝනාට දරු දෙදෙනෙකු සිටියහ. වර්තමානය වන විට ස්පෙන්සර් නම් වූ පුතු විසි හැවිරිදි වන අතර ඇලිස් නම් වූ දියණිය 14 හැවිරිදි ය.
විවාහයෙන් වසර හතරකට පසු, එනම් 2003 වසරේ දී කෝල්ට්‍රන් සහ රෝනා ඔවුනොවුන්ගෙන් වෙන් වී වාසය කරන්නට වූ අතර පසු කාලයේ ඔවුන් නීතියෙන් ද වෙන්වනු ලැබිණි. මෙම දික්කසාදය පිළිබද මාධ්‍ය මගින් විමසූ අවස්ථාවලදී ඔහු පවසා සිටියේ “අපි විවාහ වෙන්නේ නැතුව එකට ගත කළ කාලය පුරාම අපි දෙන්නා ගොඩක් සතුටින් කාලය ගත කළා. ඒ කාලය තමයි අපේ ජීවිතවල හොදම කාලෙ වුණේ. විවාහ වුණාට පස්සේ තමයි නොගැලපීම් මතු වෙන්න පටන් ගත්තෙ. සමහර දේවල් අවසන් වුණේ පුදුමාකාර හිත් රිදීම්වලින්. ඒ මගේ ජීවිතයේ අදුරුම කාලෙ කිව්වොත් හරි. ඔබ ඕනෑම කෙනෙකුට ආදරය කරන්න. හැබැයි කිසිම කෙනෙක් එක්ක විවාහ වෙන්න එපා. ඒක තමයි මම ජීවිතයෙන් ඉගෙන ගත්තු ලොකුම පාඩම“ යනුවෙනි.
දුලංජලී මුතුවාඩිගේ