කිසියම් රටක් ශ්‍රී ලංකාවේ පවතින දුෂ්කර තත්ත්වයෙන් ප්‍රයෝජන ගනිමින් ස්වයං අභිලාෂයන් මුදුන් පමුණුවා ගැනීමට උත්සහ කරන්නේ නම් ඊට චීනය විරුද්ධ වන බවත් ශ්‍රී ලංකාව සිය ජාතික තත්ත්වයන්ට අනුකූලව ස්වාධීනව තෝරාගෙන ඇති මානව හිමිකම් ප්‍රවර්ධනය කිරීමේ මාවතට ගරු කරමින් දේශපාලන බලපෑම් සහ අනෙකාගේ අභ්‍යන්තර කටයුතුවලට මැදිහත් වීම සඳහා මෙවලමක් ලෙස මානව හිමිකම් පාවිච්චි කිරීමේ පුරුද්ද අත්හරින ලෙස අදාළ පාර්ශවයන්ගෙන් ඉල්ලා සිටින බව ජිනීවා හි එක්සත් ජාතීන්ගේ කාර්යාලයේ චීනයේ නිත්‍ය නියෝජිත චෙන් ෂු මහතා පවසා තිබේ.ඒ එක්සත් ජාතීන්ගේ මානව හිමිකම් කවුන්සිලයේ 51 වැනි සැසිවාරයේ දී ඊයේ (12) ශ්‍රී ලංකාව පිළිබඳ අන්තර් ක්‍රියාකාරී සංවාදයේදී ය. එමෙන්ම ඔහු ශ්‍රී ලංකාවට එරෙහි බාහිර මැදිහත්වීම්වලට විරෝධය පළ කොට තිබේ. කිසියම් රාජ්‍යයක අභ්‍යන්තර කටයුතු සඳහා මැදිහත් වීම පිණිස මානව හිමිකම් මෙවලමක් ලෙස පාවිච්චි කිරීමෙන් වළකින්නැයි ඔහු සියලු පාර්ශ්ව වලින් ඉල්ලා තිබේ.ත්‍රස්තවාදයට එරෙහි වෙමින් සංහිඳියාව සහ ප්‍රතිසංස්කරණ ඉහළ නංවමින් මානව හිමිකම් ආරක්ෂා කිරීම සහ ප්‍රවර්ධනය කිරීම සඳහා ශ්‍රී ලංකාවේ අඛණ්ඩ උත්සාහය චීනය අගය කරන බව තානාපති චෙන් මහතා එහිදී අවධාරණය කර තිබේ. ශ්‍රී ලංකාවේ සාම්ප්‍රදායික මිත්‍ර අසල්වැසියෙකු ලෙස චීනය ශ්‍රී ලංකාවට ජාතික ස්වෛරීභාවය සහ ස්වාධීනත්වය ආරක්ෂා කරමින් සමාජ ස්ථාවරත්වය පවත්වා ගැනීමට සහ ආර්ථිකය ප්‍රකෘතිමත් කර ගැනීම සඳහා උපරිම සහාය ලබාදෙන බවත් තාවකාලික දුෂ්කරතා මඟහරවා ගැනීම සඳහා ජනතාවට නායකත්වය දීමට ශ්‍රී ලංකා රජයට හැකි බව තමන් විශ්වාස කරන බවත් හෙතම වැඩිදුරටත් එහිදී ප්‍රකාශ කොට තිබේ.ශ්‍රී ලංකාව සම්බන්ධයෙන් එක්සත් ජාතීන්ගේ මානව හිමිකම් කවුන්සිලයේ යෝජනාව දේශපාලනීකරණය මැදිහත් වීමක ප්‍රතිඵලයක් බව චීන තානාපතිවරයා එහිදී අවධාරණය කරන ලදී. එය අපක්ෂපාතීත්වය, වාස්තවිකත්වය සහ තෝරා-නොගැනීම යන මූලධර්මවලට අනුකූල නොවන බවත් අදාළ යෝජනාව ශ්‍රී ලංකාව විසින් පිළිගෙන නොමැති අතර ශ්‍රී ලංකාව තුළ මානව හිමිකම් ප්‍රවර්ධනය කිරීම සහ ආරක්ෂා කිරීම සම්බන්ධයෙන් එම යෝජනා සාධනීය කාර්යභාරයක් ඉටු කර නොමැති බවත් චෙන් ෂු එහිදී ප්‍රකාශ කොට ඇත.